عيوب ومميزات

محمد عياد

منذ 2019-08-07 05:53:15

لكل مشتري فينا مواصفات خاصة بيه في السيارة اللي عاوز يركبها ده غير المواصفات العامه عشان كده ممكن اللي ينفع معايا ما ينفع معاك والعكس لكن انا هركز على المواصفات العامة اللي تهتم الغالبية علما بأن المقارنة بعربيات نفس الفئة السعرية مش اكبر منها مميزات وعيوب ان شاء الله المميزات اولا في بيجو 301

1- الثبات ثبات عالي جدا في سيارة من الفئة دي بل هو الاعلي في كل الفئة السعرية دي بشكل يصل للألماني بسهولة وان لم يتطابق تماما معه

2- القوة العربية دي بتاعة شغل ومشي وجري وحركة وطرق صعبه حسب تجربتي مش عربية هفأ ولا ضعيفه يعني عربية تقدر تشتغل تاكسي مثلا وانت عارف يعني ايه تاكسي يعني هلكه والعربية من قوتها امان للراكب وابوابها مصفحة عشان كده تلاقيها تقيله وانت بتقفلها وعاوز تجمد عليها شويه عشان تقفل الباب

3- النعومة والراحة في الركوبة ناعمة في حركتها ومشيتها وسرعتها ومريحة في الركوبة جدا مع كراسي من اسفنج ممتاز لا تشعر بطول الطريق مهما طال في المسافات الكبيرة المعتادة واللي ممكن توصل في اتجاه واحد ل 3 ساعات او 4 بي محافظتين بعيد عن بعض شويه تشعر كانك كنت في نزهه ولا يبقي لك الا تعب السفر العادي مش العربية خالص والعربية ناعمة في القيادة بشكل مريح جدا وتنفع جدا للبنات اللي عاوزه ترتاح في القيادة مع الامان تجمع بينهم

4- الصالون للسائق والراكب الامامي والخلفي قعدة مريحة لا تختلف كثيرا صراحه ولا تشعر فيها الا بمتعة العربية وراحتها وصالونها ممتاز في الفئة دي مقارنة بكل الفئة السعرية لمثلها وعموما صالونها ركوبته تخليك تحس بالفخامه

5- التسارع حقيقي انا اقدر اقول تسارع عالمي رائع بعد النقلة الثانية تقريبا حاجه ممتعة جدا لدرجة اني بتلكك يجي لي سفر عشان اتمتع بقيادة العربية الجميلة دي

6- الوسع العربية واسعه في صالونها بشكل ممتاز وفي الشنطة مساحة مناسبة لكل الاحتمالات فوق الطبيعية بشويه كمان يعني ما تحتاج اكبر من كده تقريبا من حيث الارتفاع والعرض والعمق

7- عجلة القيادة (باور ستيرنج) هي حاجه وسط امان كده لا هي ناعمة نعومة الريش اللي يطيرك في الهوا وما تتعرفش تتحكم فيه ولا هي تقيلة تقل الرخامه اللي تجيب لك شد عضل انا شايفها على الطريق السريع ممتازة ممتازة ممتازة وامان وجوه البلد مناسبة جدا واكتر من كده مالوش لازمه تقريبا

8- الملفات والتغريز والمناورة زاوية دوران العربية في الملفات 180 كاملة طبيعية اكبر من عربيات كتير لما تاخد بيها ملف تحتاج لزاويو منفرجة اكبر ودي ميزة تنفع جدا في الملفات الضيقة وعند دوران العربية لعكس الاتجاه في مكان ضيق جدا جدا جدا وانا جربتها وفي المناورات على الطريق تحس انك راكب عربية أتاري من سهوله ونعومة وقوة لعبها على الطريق مع الامان ..كانك بتعلب مش سايق بجد ..متعة متعة يعني

9- الفتيس عالمي يعني لما تكون عربية في الفئة دي فتيس 6 حركات وايضا ستيبترونك في السيارة الور موديل 2019 ومش عارف كان في اللي قبلها ولا لا صراحه لكن كمان الفتيس فيه ميزة سبورت مود وهي اضافات جيدة عند الحاجه اليها 10- التكييف انا واحد بشغل التكييف في العربية صيف وشتا كمان

-------------------------------------------------------------------------------------------

1- التسارع

رغم كل اللي حكيته عن عاملية التسارع لكن ده بعد النقلة التانيه تقريبا لكن الفتيس الجيمل العالمي ده بيطلع على الاول والتاني كأنك راكب جمل او فيل وده بخنق جوه البلد على سرعات قليلة في اول ما تتحرك بالعربية

2- الوسع

العربية واسعة في كل شئ الا الماكينة ضيقة جدا فلو انت من هواة اللعب في الماكينة بنفسك وتغيير حاجات وكده هتتعب اوي مع الماكينة دي ولازم متخصص فاهمها كويس خاصة ان كتير من الاشياء الواضحة في ماكينة عربيات تانيه بتكون متخبية في العربية دي

3- عجلة القيادة (باور ستيرنج)

الحقيقة هي في نظري معتدلة لكن في الركنات والاتجاه عكس 360 درجة تقيله عن الباور في عربيات خفيفه مريحه في النقطة دي احسن منها

4- التكييف

المشكلة الوحيدة في نظري هي انه كل مرة افتحه فيها لازم اظبطه على الوضع اللي بحبه لكن في عربيات تانيه لما بتقفله على وضع بتفحته يرجع لك نفس الوضع

موضوع ممل وعاوز واحد فاضي لكن ما علينا بالنسبة لتبريده مواااااااااافق

- هوايات التكييف (فتحات التكييف )

بصراحة انا شافه عيب صناعة لان فتحات اللي امام الوجه او تحت الزجاج او عند الرجلين كلها منفده علي بعضها فلو شغلت اي اتجاه منها منفردا بيجيب بردو هوا في باقي الاتجاهات غصب عنك حتي لو قافل دورة الهوا الداخليه

وده اللي بيسبب ان في الصيف تشغل التكييف بالليل تلاقي زجاج العربية عمل شبوره تمنع الرؤية ولازم كل شويه تشغل المساحات وبردو ما فيش فايده

لكن ليها علاج بلدي شويه مش علمي لكن شغال كويس بيمنع الموضوع ده

5- العزل

قوي زي ما قلت لكم لكن على السرعات العالية اوي (ودي مس بتسعملها كتير ) يبدأ يبان الفرق بينه وبين عربيات افضل منها في الفئة

6- شكل العربية

من الامام جميلة اوي عالمية لكن من الخلف تحس انها قديمه ولحد دلوقتي مش قادر اتكيف مع شكلها الخلفي وفوانسها الغامقة اللي قافلة خلف العربية في الشكل

7- قطع الغيار

مش متوفرة في كل حته عادي زي عربيات كتير ولازم تبقي عارف اماكن توفرها عشان لو احتجت منها حاجه ممكن تلف عليها

8- متانة جسم العربية والتقفيل

العربية في الابواب تقيلة بفرق واضح عن عربيات فئتها لدرجة ان اللي مش متعود عليها اول ما يقفل الباب صعب جدا يقفله صح وبيكون مستغرب في ايه لان الابواب مصفحة للامان فمتقله الوزن للباب

--------------------------------------

ثانيا : عيوب اخري

1- صوت الموتور بتسمعه بوضوح تام جوه العربية ولازم تتعايش معاه وتتجاهله لو حبيت تركب العرببة دي وتطنش الموضوع اللي كل مرة بيضاقني اول ما بركب لكن بعد كده بتكيف وانسي

2- مكان المساحات الامامية لما برتفعها عشان تمسح الزجاج بتحك في صاج الكبوت ودي حاجه غريبة حدا عيب صناعة وتقفيل واضح مش عارف ازاي يفوتهم حاجه عبيطة زي دي

3- الكرسي الخلفي

لانه الشنطة ملهاش ظهر عازل عن الكرسي الخلفي ولان ممكن تفتح الكرسي الخلفي بثنيه الي الامام فيفتح على الشنطة وتصير عندك مساحة كاملة تشمل الشنطة مع مساحة الكرسي الخلفي كله

فاي حركة في شنطة العربية بتسمعها كانها جوه العربية لانها بتحك في الكرسي من الخلف شوبة روشة يعني لكن بتعدي صراحه مش ازمه

4- الشاشة في فئة أللور

بتجيب صوت بس مش صورة للاسف ومش فيها امكانية البرمجة للصورة رغم ان في شاشات او عربيات تانيه بتشتغل صورة عادي ..غريبة لكن ما علينا

5- الكبوت

غالبا في عيب صناعة وهو ان اليد اللي تحت التابلوه الي بتشدها عشان تفتح الكبوت يد ضعفيه وتحس انها هتتكسر لو شدتها